Lavik prestegjeld under Ytre Sogn prosti i Bjørgvin bispedøme

Lavik prestegjeld ligg på begge sider av Sognefjorden sin ytre del. Prestegjeldsgrensene følgjer grensene for Høyanger kommune (4778 ib). Lavik (692 ib) er hovudsoknet med bustad for soknepresten, som og er prost i Ytre Sogn prosti. Han har ansvaret for kyrkjebokføringa i Lavik sokn og i Bjordal og Ortnevik sokn (447 ib) på sørsida av Sognefjorden.

Kapellanen er busett i bygdebyen Høyanger, som er administrasjonssenteret i Høyanger kommune, og har ansvaret for kyrkjebokføringa i Høyanger sokn (2321 ib) og Kyrkjebø sokn (1339 ib).

Prestegjeldet har 6 faste preikestader: Høyanger kyrkje, Kyrkjebø kyrkje, Vadheim bedehuskapell, Lavik kyrkje, Bjordal kyrkje og Ortnevik kyrkje. Totalt er det rundt 160 gudstenester i året.

Høyanger er ein særeigen industristad bygd opp rundt verksemdene til Hydro Aluminium der ein stor prosent av arbeidsplassane i kommunen er. Servicenivået i kommunen er høgt med god barnehagedekning og få arbeidsledige. Det er flott høgfjellsnatur rundt Høyanger sentrum.

Kommunikasjonane til omverda er bra. Frå Nordeide (8 km frå sentrum) ca. 2 1/2 time med snøggbåt til Bergen. Tre gonger dagleg ekspressbuss til Oslo. Ca. ein time køyring til næraste flyplass (Førde).

Det er 11 barnehagar og 7 barneskular i kommunen, ved tre av desse er det også ungdomsskule. Kyrkja har godt samarbeid med skulane. Det er utarbeidd ein eigen skule-kyrkjeplan, og det vert arbeidd med ein skule-barnehageplan. I Høyanger tettstad er det vidaregåande skule med både allmenfagleg og yrkesretta linjer.

Kyrkjelege medarbeidarar vitjar regelmessig Lavik sjukeheim (18 plassar), Kyrkjebø sjuke- og aldersheim (49 plassar), Høyanger sjukeheim (24 plassar). Det er og andaktar på Høyanger eldresenter, og vitjingar etter behov på Tronvik psykiatriske fylkessjukeheim (40 plassar). Soknepresten har ansvar for Lavik sjukeheim. Tenestene på dei andre institusjonane vert delte mellom kapellan, diakon og friviljuge.

Kapellanen har kontor i Høyanger kyrkjekontor, vis-à-vis rådhuset. Her er det fine og velutstyrte lokale på gateplan for sokneprest, kapellan, kyrkjeverje, kyrkjelydssekretær og kontorfullmektig, til saman 112 m2. Alle har eigen PC i nettverk. Kontoret har elles telefax, kopimaskin og Internett, og kvar av prestane har eigen mobiltelefon. Dei administrative rammene rundt prestetenesta er svært gode.

Soknepresten har sitt hovudkontor i prestebustaden i Lavik, men har i tillegg ein fast kontordag i veka i Høyanger. Denne dagen samlast dei tilsette til stabsmøte.

Utanom dei to prestane er det følgjande heiltidstilsette i prestegjeldet:

Kyrkjeverje, soknediakon, kyrkjelydssekretær (for tida ledig), to organistar. Vidare har ein to kontorfullmektigar (50% og 30% stilling) og klokkar- og kyrkjetenarstillingar ved alle kyrkjene.

I Kyrkjebø eig soknet kyrkjelydshus nær kyrkja. I Høyanger arbeider ein med planar for bygging av kyrkjelydshus. I Lavik har Det norske misjonsselskap leirstaden Alværa misjonssenter, som også vert nytta i kyrkjelydsarbeidet.

I følgje gudstenesteordninga er det gudstenester i Høyanger og Kyrkjebø annakvar søndag, i Lavik, Bjordal og Ortnevik tredjekvar og Vadheim fjerdekvar. Det vil seie at ein av prestane nokre søndagar har to gudstenester. Ein har som mål at kvar prest får ein frisøndag i månaden.

Frammøtet til gudstenestene varierer. Det er bra i bygdene og middels i sentrum. Familiegudstenester har god tilslutnad. Sokneråda på staden er godt motiverte for arbeidet i kyrkjelyden. Dei siste åra har kyrkjelyden hatt eit spanande samarbeid med Hydro Aluminium om diakonalt arbeid, og soknediakonen har i dag 50% av sitt arbeid knytt til Hydro-verksemdene. Ein har også godt samarbeid med Sanitetsforening og andre lag og organisasjonar.

Utanom NMS si verksemd i tilknytnad til Alværa misjonssenter i Lavik, er det lite organisasjonsarbeid, men KFUK/M-speiding er det god tradisjon for både i Høyanger og Kyrkjebø. Det finst nokre få dissentarar (for det meste innvandrarar), og ein del av desse deltek i ei tverrkyrkjeleg bibelgruppe i Høyanger-Kyrkjebø. Det har dei siste åra vore gospelkor både for born og vaksne i Høyanger.

Årsstatistikken viser at det i heile prestegjeldet i 1997 var 69 døypte, 69 konfirmantar, 20 brudevigsler, 55 gravferder og 168 gudstenester.

I følgje arbeidsfordelingsplan har kapellanen hovudtyngda av sine tenester i sokna Høyanger og Kyrkjebø. Han vil ha ca. 4/7 av gudstenestene i prestegjeldet og omkring 2/3 av alle gravferder og vigsler. Pga. svært lange reiseavstandar har ein funne det meir føremålstenleg med ei geografisk fordeling mellom prestane enn å ha kvar si tenesteveke.

Kapellanen møter fast i Høyanger og Kyrkjebø sokneråd, soknepresten i fellesrådet, Lavik sokneråd og Bjordal og Ortnevik sokneråd.

Kapellanen har konfirmantførebuing i Høyanger, Kyrkjebø og Vadheim, medan soknepresten har ansvar for Lavik, Bjordal og Ortnevik. Konfirmantførebuinga er utanom skuletida.

Kapellanen er vikarierande prost for Ytre Sogn prosti. Prostiet har 6 prestegjeld og 8 prestar.

Målforma er nynorsk både i kyrkje, skule og kommuneadministrasjon.